Mer Pälzer un die Weltachs
von Paul Münch
Wann jemand uf de Infall käm,
Die Achs vun unserm Weltsyschtem
Genaa un dipplich auszurechne
Un in die Landkart inzuzeechne,
Do käm`s eraus, daß akkerat
Im Mittelpunkt vum Pälzer Staat
Der Punkt leit, der wo ganz gewiß
Die Hauptsach ufèm Weltall is,
Der Punkt, so alles sich drum dreht,
Was uf der weite Welt besteht.
Dort werd die Weltachs ingeschmeert
Un ufgebaßt, daß nix passeert,
Was in de Weltelaaf am End
E kleeni Steerung bringe kennt.-
Schun seit der Herr die Welt gebaut,
Is uns die Weltachs anvertraut,
Weil meer vun alle Menscherasse
For so e Amt am beschte basse.
Mer bassen uf, mer halten Wacht,
Mer gewen Dag un Nacht druf acht,
Daß niemand kummt un will se stehle.
Mer schmeere se un dun se öle
Un butzen se als glitzeglatt
Mit Glaspapier un Butzpumad.
Drum dreht sich a wie selbschtverständlich
Die Weltachs ewig un unendlich.--
O weh! O weh! Wär des e Schlag,
Wann plötzlich ame scheene Dag
Mer Pälzer Leit de Rappel kräte
Un mir nix, dir nix streike däte!
Das Unglück wär nit auszumole:
Do dät uns all de Guguck hole:
Die Erd, die Sunn, de Mond un alles,
Des krät am selbe Dag de Dalles.
Im ganze Weltall dät`s do bollere
Un alles durchenanner kollere.
Do gäb`s ee Riesekuddelmuddel,
Die Milchstroß gäb e Mordsgeschnuddel
Un all des scheene Schöpfungs-Sach
Hätt alles rutzebutz die Krach.
Un drum sa`t unser Hergott a
Schun glei am vierte Schöpfungsda`:
"So", sa`t er, "Mond un Stern un Sunn
Die drehe sich un glitzre schun,
Mei Weltachs schnerrt, `s is grad e Spaß,
Als wie e Triller uf de Gass`.-
Jetzt braicht ich Mensche, wo`s verstehn
Mit meiner Weltachs umzugehn,
Wo Kerle sin erschter Qualidät
Un Riese an Gescheidigkeet,
Mit Hern im Kopp, mit Pflicht un Ehr,
Korzum! Die Pälzer missen her;
Die missen dann die Weltachs schmeere
Un`s Kugellager repareere." -
"Un" - sa`t er - "dann werd`s ingericht,
Daß alles in der Weltgeschicht
Beim Pälzer Volk im Pälzer Staat
Sein Ursprung un sein Fortgang hat." -
So sat`er. - Un so is es kumm.
Un um die Weltachs runderum,
Do hockt seit viele dausend Johr
Sei Pälzer Volk un sorgt defor
Bei Dag un Nacht un früh un spät,
Daß Gottes Weltplan richtig geht,
Un daß es Weltall werd gelenkt,
So wie sich`s Gott hat ausgedenkt.--
Un was nit in der Palz basseert,
Is Newesach un hat kee Wert. -
